INFORMACIÓN FITOSANITARIA 14/07/2023
A información que aportamos nos nosos boletíns fitosanitarios baséase no observado nas nosas parcelas de seguimento, noutros predios que visitamos nos nosos percorridos e tamén nos datos que nos aportan diferentes persoas (técnicas e viticultoras). Con todo, hai que revisar sempre cada situación particular, pois pode haber diferencias, e só analizando o estado de cada predio poderemos lograr, entre todos, unha mellor xestión dos nosos cultivos
VIÑA
Nas viñas de albariño das distintas comarcas vitivinícolas, o estado fenolóxico dominante segue a ser o de acio pechado. Non obstante, nalgúns acios especialmente solleiros de zonas cálidas hai uvas que empezan a brillar, e tamén nas variedades máis temperás hai grans en pintado.
Mildio
Como ven sendo habitual nesta campaña, todos os días da semana transcorrida desde o boletín anterior a humidade relativa media foi superior a 75% todas as xornadas, estando en case todas as estacións meteorolóxicas na contorna de 82-87%. Amais, houbo precipitacións na fin de semana e tamén o mércores día 12. Canto ás temperaturas, as mínimas mantivéronse bastante cálidas aínda que, salvo excepcións, non tanto coma nas semanas anteriores. Con estes rexistros climatolóxicos, todos os días cumpríronse as condicións para a esporulación, o que tivo bo reflexo no elevado número de esporas que se recolleu no captador que temos instalado nas plantas testemuña da nosa viña de Areeiro: 3029 entre o mércores 5 e o martes 11, cunha cifra máxima de 1105 o venres día 7.
![Concentración diaria de esporanxios Concentración diaria de esporanxios](https://arquivos.depo.gal/documents/1262612/1267348/Grafico_14_07_2023.jpg)
Porén, na revisión desta semana ás viñas non atopamos ningún síntoma novo nos acios, que aínda se manteñen sensibles ao patóxeno, nin sequera nas viñas que levan xa un mes sen aplicacións funxicidas.
Polo que respecta ás plantas testemuña sen tratamentos, os acios levan xa semanas máis dun mes completamente destruídos polo fungo, e aínda non se desprenderon.
Canto á folla e/ou os pampos, tampouco observamos síntomas, se exceptuamos neste caso as partes máis altas das viñas moi frondosas.
As predicións das diferentes axencias meteorolóxicas consultadas anuncian nestes momentos bo tempo e ventos do norte para os próximos días exceptuando o de hoxe, venres 14, e o de mañá, en que haberá precipitacións. A contía prevista é variable segundo a axencia e tamén varía coas actualizacións dos modelos meteorolóxicos, pero pode chegar a superar os 10 l/m2. Por estas choivas, pero tamén pola climatoloxía que houbo no conxunto desta campaña, con por exemplo 25 dos 30 días do mes de xuño con condicións favorables ao patóxeno, non hai que descoidar de momento a vixilancia e renovar os tratamentos no caso de que proliferen novos síntomas e/o as precipitacións sexan abundantes. A vixilancia debe ser elevada nas viñas coa uva sa ou con poucos danos, pero hai que estendela tamén a aqueles predios nos que se perdeu case toda a colleita pensando xa na campaña próxima.
Oídio
Esta semana unicamente observamos un novo acio con síntomas do fungo, que aínda poden seguir aparecendo ata o pintado. As contaminacións secundarias por este fungo están causadas por conidios que se propagan polo vento, pero non require auga líquida, aínda que si alta humidade e niveis de luz baixos. Manter a vixilancia e renovar as aplicacións en caso de realizar outras intervencións e de observar un avance da enfermidade.
Black rot
Tampouco nesta semana observamos novos síntomas, pero de momento hai que manter a vixilancia e, se a enfermidade está presente e teñen que renovar un tratamento fronte a mildio e/ou oídio, usen materias activas tamén rexistradas para o control deste fungo.
Botrite
A presenza de acios danados por mildio, moi abundantes nalgunhas viñas esta campaña, ou por oídio, avelaíña ou rachos fisiolóxicos ou mecánicos, obrigará a prestar moita atención á aparición deste patóxeno a partir de agora, sobre todo baixo condicións de elevada humidade relativa e/o choivas. De feito, esta semana xa vimos o primeiro síntoma nunha variedade temperá sensible.
Cicadelidos
Non estamos a recoller apenas adultos de mosquito verde nas trampas, pero si algunhas persoas están a falar de que hai síntomas do seu ataque. Lembren que hai veces que hai síntomas na viña que poden asociarse erroneamente ao seu ataque como son déficits hídricos, carencias nutricionais, a acidez do solo. Por iso, as trampas son un medio sinxelo, económico e fiable para coñecer realmente a incidencia destes insectos na viña e evitar así aplicacións innecesarias.
Porén, segue a ser necesario aplicar tratamentos na zona sur da provincia para reducir na medida do posible as poboacións de Scaphoideus titanus, o cicadelido vector da flavescencia dourada, do que se seguen a recoller bastantes adultos nas trampas. Esta é unha medida imprescindible para tentar limitar o avance da flavescencia e por iso non debe descoidarse, amais de eliminar e destruír as plantas abandonadas e de prestar moita atención a onde se compren as plantas que se teñen que repoñer nunha plantación por exemplo.
Avelaíñas da uva (Lobesia botrana, Eupoecilia ambiguella)
Seguimos a ter baixas capturas de Lobesia botrana, pero xa observamos a primeira penetración dunha eiruga nunha das nosas parcelas de seguimento. Manter a vixilancia e o seguimento das trampas.
Outras incidencias
NOGUEIRA
Mosca da casca verde da noz (Rhagoletis completa)
Está a comezar o voo desta especie, cuxas larvas destrúen a casca verde da noz, que podrece e seca, diminuíndo a calidade das noces. Para o seu control, poden empregar trampas de feromona e eliminar tamén os froitos caídos ao chan para evitar que as larvas se enterren para pupar.
Os síntomas nas noces poden ser confundidos cos do fungo responsable da antracnose da nogueira que, fronte á mosca, tamén xera síntomas en forma de manchas escuras nas follas.