A fenoloxía da viña vaise aproximando progresivamente á floración. Así, xa a maioría dos gromos dos patróns que quedan nos viñedos ("bravos"), que como sabemos son máis precoces co albariño, xa teñen a práctica totalidade de flores abertas. Por outra banda, aínda que nós non o confirmamos, tamén nos informaron de que xa empezaban a abrir algunhas flores de plantas de albariño nalgúns sitios.

De volta temos que seguir a falar dunha climatoloxía que, como ven sendo normal esta primavera, non termina de estabilizarse e que alterna días de tempo seco e "só" con humidade relativa elevada con días de precipitacións e, ultimamente, tamén tronadas. A estas condicións referidas á humidade hai que engadir unhas temperaturas suaves-altas e así temos unha combinación a nivel meteorolóxico que favorece o desenvolvemento de moitos patóxenos, entre eles o mildio. Deste xeito, e a pesar dos tratamentos que se están a efectuar, esta semana recibimos informacións, de diversas fontes, de predios onde había ataques xa bastante importantes, incluso con presenza do patóxeno en pampo e/ou en acio, nun caso concreto de ata o 30%  de acios afectados.

Canto ás nosas propias revisións, só atopamos un ataque relativamente forte nunha viña de Cambados que non forma parte da nosa rede, pois as parcelas da nosa rede e máis as demais que visitamos esta semana mantíñanse en bo estado (de feito, foron poucos os esporanxios recollidos nos captadores). Iso si, o luns 5 detectamos a primeira mancha na nosa viña de Areeiro, que estaba aínda sen recibir tratamento algún na campaña.

Tamén esta semana apareceron as primeiras manchas en follas de plantas abandonadas de diferentes variedades que hai nalgúns camiños e muros, e que só soen atoparse cando as condicións meteorolóxicas son moi favorables ao patóxeno.

Segundo as previsións meteorolóxicas consultadas, continuará o aire frío sobre a península, e incluso pode descolgarse unha DANA sobre a nosa zona. Deste xeito, a curto prazo volverán as precipitacións incluso con altas probabilidades de aparato eléctrico segundo as zonas e avisos de nivel amarelo por choivas abundantes nunha hora. A medio prazo non hai coincidencia total entre os diferentes modelos consultados se ben todos indican que persistirá a inestabilidade en maior ou menor grado e que, en xeral, baixarán as temperaturas mínimas e subirán as máximas. Á vista destes prognósticos temos que seguir a aportar as mesmas recomendacións das semanas anteriores: vixiar con atención e periodicamente o estado das viñas, sobre todo dos acios, por si se produce un incremento de síntomas malia os tratamentos realizados e comprobar que non haxa frutificación e/ou zonas de avance nas manchas antigas, en especial nos predios que levan máis tempo sen recibir tratamentos. En caso de que se comprobe unha evolución da enfermidade, seleccionen moi ben o/s funxicida/s, que debe/n ser sistémico/s, para protexer os novos crecementos, e ter unha acción curativa e tamén preferiblemente antiesporulante, sobre todo nos casos, poucos de momento, onde hai xa ataques importantes do patóxeno. E non esquezan manter un bo control da vexetación acompañante, máis aínda nas formacións en espaller.

Tampouco na revisión que realizamos esta semana atopamos os primeiros síntomas do fungo, tanto nos predios que imos revisando nos nosos percorridos (cuxos tratamentos descoñecemos) como nas parcelas da nosa rede de seguimento habitual (sen tratamento algún de momento fronte a este patóxeno).

O mantemento de condicións de humidade relativamente elevada, entre outras causas polas choivas que se están a rexistrar todas as semanas, provocaron que aparecera a frutificación do fungo naquelas follas que posuían síntomas de maneira significativa e que aínda se manteñen en certas viñas. Estes síntomas observámolos unicamente na zona do Condado e só en predios moi concretos, non de xeito xeral. Porén, debido aos prognósticos de persistencia do tempo inestable haberá que estar pendentes por si empezan a manifestarse síntomas tamén nas follas lesionadas por vento ou sarabia, nos gromos rotos polos ventos que hai en moitas viñas ou incluso nos acios nos que empece a haber flores abertas. 

Na revisión desta semana pola comarca do Condado atopamos o primeiro síntoma de black rot nas mesmas plantas abandonadas onde o detectamos sempre, e curiosamente na mesma semana que na campaña anterior. Nas parcelas tratadas desa ou de calquera outra comarca non os observamos, pero recomendamos que polo menos naqueles predios que teñan antecedentes de danos causados por este fungo escollan a partir de agora funxicidas tamén rexistrados para controlalo ao facer unha intervención antimildio ou un potencial tratamento antioidio si é que non é preciso unha intervención específica fronte a él.

Nas observacións desta semana realizadas ao envés das follas das zonas do sur da provincia non atopamos aínda as primeiras ninfas do insecto Scaphoideus titanus, que na campaña 2024 foran detectadas en maio. As circunstancias poden variar entre campañas, pero a partir de agora cobran aínda máis importancia as medidas obrigatorias para tentar de frear o avance da enfermidade da flavescencia dourada. Lembren que segundo o Decreto 29/2025, polo que se cualifica de utilidade pública a erradicación deste organismo de corentena en Galicia e se ordenan as medidas para evitar a súa propagación, a Consellería de Medio Rural poderá executalas cos seus propios medios ou utilizando servizos alleos, e cargará os gastos correspondentes ás persoas que non as practicasen.

Segue a aparecer nalgunhas viñas o síntoma ao que nos referiramos a semana anterior neste mesmo apartado: follas que pola face teñen nalgunha zona a cor dunha mancha de mildio pero que polo envés teñen unha zona brillante de cor castaña. Pois ben, nas análises que se están a realizar no laboratorio de momento non se detectaron patóxenos, e consideramos que, igual que nos outros anos nos que apareceron, son debidos a unha fisiopatía. Aparte desta incidencia, esta semana foi bastante frecuente atopar gromos rotos por vento.

Na nosa parcela de Areeiro de incrementou sensiblemente o número de capturas de machos na trampa, pero non imos realizar tratamentos para comprobar como evolucionan. Lembren que as trampas de feromonas non exercen un control desta bolboreta, pero son unha boa ferramenta, aparte de barata, para seguir o seu voo e ver como evolucionan as súas poboacións, o que axuda a aplicar os tratamentos nos momentos máis adecuados.

Xa hai bastantes plantas de diferentes variedades con síntomas máis ou menos intensos desta enfermidade. Aínda que xa pasou a data que resulta prioritaria para dar un tratamento, aínda se poden aplicar funxicidas para reducir os seus danos, en especial en anos coma este nos que os períodos húmidos son unha constante.

Coa climatoloxía chuviosa de xeito intermitente desta primavera é FUNDAMENTAL non descoidar os tratamentos fronte a estas patoloxías para evitar os importantes danos que poden causar sobre a futura floración, e un dos momentos clave é agora, cos botóns florais desenvolvidos. Dado o carácter preventivo destas intervencións, deben renovarse de acordo ao período de protección do fungicida empregado, polo menos ata a apertura da flor.

Tras este novo episodio de precipitacións haberá que realizar un novo tratamento dirixido ao control destes parasitos.