Nas visitas realizadas esta semana ás viñas (luns 2 e martes 3) notamos, na grande maioría de predios, un claro avance na fenoloxía das viñas, que se manifestou non só en que case todas elas, cando menos no referente ao albariño, xa terminaron a floración, senón tamén en que incrementaron bastante o tamaño dos grans. Ademais, o feito de que este decisivo estado da planta transcorrera, en xeral, sen choivas, permitiu que boa parte dos capuchóns ou restos florais xa estean desprendidos e que polo tanto haxa que falar dunha floración limpa.

Con todo, tamén é certo que quedan plantas con acios de diferentes graos de floración e callado dos froitos, e tamén acios nos que os restos florais permanecen adheridos aos grans en formación.

Como xa dixemos, esta semana tivemos que realizar as nosas revisións entre o luns día 2 e o martes día 3. Polo tanto as observacións producíronse despois das temperaturas moi altas de finais de maio e o tempo seco dos días pasados. A situación que apreciamos en xeral, tanto nas parcelas da nosa rede de seguimento habitual coma noutras nas que nos detemos nos nosos percorridos, foi de ausencia case total de síntomas novos en todos os predios do Rosal e O Salnés pero non así no Condado. Así, nas dúas primeiras comarcas, incluso en viñas nas que a semana pasada presentaban síntomas viables tanto en folla coma en acio, nesta revisión aparecían secos e sen frutificación algunha. Neste senso, tamén as capturas de esporanxios na nosa parcela de Sanxenxo seguen a ser reducidas malia época do ano na que nos atopamos.

Polo contrario, en varias viñas da comarca do Condado, e tamén nalgúns predios do Ribeiro segundo deducimos das numerosas chamadas que tivemos desa zona, a situación non é tan favorable, pois hai follas e acios, a maioría máis atrasados no seu desenvolvemento, con síntomas novos e activos.

Tamén se incrementaron relativamente esta semana os síntomas nas plantas das filas testemuña da nosa viña de Areeiro, onde temos instalado o outro captador de esporas, que desde o día 31 de maio recolleu un número de esporanxios superior a 100.

Como xa dixemos no boletín anterior, estamos nun momento decisivo para a futura colleita, pois os grans dos acios que se veñen de formar son moi sensibles ao mildio. Ademais disto, desde a noite do día 3 ou a madrugada de onte día 4 hai precipitacións que viñeron a complicar a climatoloxía e, segundo as previsións das diferentes axencias meteorolóxicas consultadas, a curto prazo continuará habendo certa posibilidade de choivas con temperaturas normais para a época do ano pero previsiblemente o domingo entrará unha masa de aire cálido desde o norte de África que fará subir as temperaturas ata 10 graos por riba do normal e o tempo se estabilizará para volver a inestabilizarse desde metade da semana pola posible influencia dunha  DANA. Con esta situación, e ante o momento tan susceptible no que nos atopamos, a nosa recomendación é loitar fronte ao mildio combinando o uso de produtos funxicidas con efecto curativo e antiesporulante coas labores culturais de roza da vexetación acompañante e, en especial naqueles predios onde xa houbo ou hai focos de infección activos, tamén coa eliminación de netos, o despunte das ramas e mesmo algunha esfolla lixeira para favorecer a aireación e a penetración do caldo fitosanitario no dosel da viña.

Nas revisións desta semana tampouco voltamos atopar síntomas deste patóxeno, pois a protección dos antioídio que se están a aplicar cos tratamentos antimildio está contendo ben a este patóxeno. Con todo, non convén descoidar a vixilancia pois ademais, a luz difusa que temos estes días, polas nubes ou as néboas, máis a humidade asociada a estes fenómenos son condicións moi favorables ao patóxeno.

O desprendemento en xeral dos capuchóns florais por unha floración maioritariamente desenvolvida en tempo seco non favoreceu a instalación deste patóxeno. Con todo, as altas temperaturas e a humidade elevada que xa temos poden favorecelo e por iso haberá que incrementar a vixilancia, en especial sobre os acios cuxos capuchóns florais non están desprendidos e/ou en  viñas nas que os ventos do norte destes últimos días romperan pampos.

Esta semana non notamos maior incidencia da enfermidade nas viñas que visitamos. Con todo, co incremento da humidade derivado destas choivas e a subida de temperaturas posterior haberá que estar máis alertas, pois poderanse manifestar tanto as infeccións que puideran ter ocorrido anteriormente como as novas, e non hai que esquecer que a máxima sensibilidade dos acios comeza agora.

Do mesmo xeito que nos informaron outros técnicos, observamos algún glomérulo pero non estamos a ter capturas de adultos nas trampas. 

As capturas de Empoasca vitis nas trampas continúan a ser moi baixas, así como as ninfas da especie que observamos nas mostraxes de follas ao azar. Canto a Scaphoideus titanus, o vector da flavescencia dourada, algunhas das ninfas que se atoparon esta semana xa están en estado N2. Lembren que a semana anterior foi cando apareceran na provincia de Pontevedra as primeiras ninfas e que o primeiro tratamento hai que aplicalo ás catro semanas aproximadamente da súa detección.

A nivel de pragas seguimos vixiando a poboación de acariose (Calepitrimerus vitis) que atoparamos nunha viña do Rosal. Tamén segue a haber plantas que van colapsando por patóxenos de madeira. Por outra parte, atopamos un número  elevado de pampos rotos polo vento.

Colocamos unha nova trampa, neste caso en Pontecaldelas, e a cifra de capturas que tivemos na primeira semana foi de 17 machos, lonxe dos 46 que capturamos na trampa de Areeiro esta semana.

Esta semana capturamos os dous primeiros machos nunha das trampas que temos instaladas na nosa parcela de Areeiro.