RECOMENDACIÓNS FITOSANITARIAS 07 OUTUBRO 2019

MACEIRA E OUTRAS FROITEIRAS EN ÉPOCA DE COLLEITA

Coidados e precaucións na colleita

A colleita da froita é unha fase delicada que debe facerse con coidado para prolongar no posible o tempo de conservación. Por este motivo, e para previr ao máximo a aparición de podremias nos almacéns, hai que tomar unha serie de precaucións:

  • antes de empezar, retirar os froitos en descomposición caídos ao solo, pois poden ser un perigo para as persoas que fan a colleita;
  • evitar facer a recolección con choiva ou nas primeiras horas da mañá cando a froita aínda está mollada polo orballo;
  • arrincar a froita con coidado, mellor co pedúnculo, e procurar non causar lesións ou feridas;
  • nunca mesturar froita sa con outra con podremias, danos por Cydia pomonella, rachos na pel por moteado, picaduras ou mordeduras, etc.;
  • o lugar de almacenamento debe ser fresco, escuro e ventilado para facilitar a conservación.
Mazás do solo son fonte de contaminacion e risco na colleitaDaños por pajaros y macho de Drosophila suzukii

NESPEREIRA

Moteado

O moteado é unha patoloxía que afecta a moitas destas árbores, sobre todo en anos húmidos. Nestes momentos estas especies teñen a inflorescencia formada e é nesta época cando convén facer un tratamento cun produto de cobre para previr a enfermidade. Se hai choivas deberá repetirse a intervención cando menos despois da formación do froito.

Nespereira - Síntomas de moteado na follaNespereira - Danos de moteado no froito

CÍTRICOS

Phytophthora spp

As precipitacións que se rexistraron na última semana de setembro (con choiva acumulada nun día na contorna dos 20-30 l/m2 e máximos de 42-47 l/m2 nalgunha estación meteorolóxica) e primeiros días deste mes (de bastante menor contía en xeral), máis as que se poidan producir desde agora, son condicións favorables ao desenvolvemento destes fungos. Por este motivo, e ao igual que dixemos no caso da nespereira, antes de que veña un novo período de precipitación, convén aplicar un tratamento preventivo cun funxicida a base de cobre para protexer ás árbores de posibles infeccións (atención: recoller previamente a froita que se espera consumir para respectar o prazo de seguridade do produto empregado). Ademais deste tratamento preventivo, no outono–inverno hai que evitar que se acumule auga no pé da árbore aínda que se produzan choivas reiteradas e cuantiosas.

Por outra banda, desde o momento en que aparezan froitos con síntomas de  Phytophthora  hibernalis, estes deben ser retirados canto antes tanto da árbore como do chan (esta medida contribúe a limitar a extensión da enfermidade).

Este limoeiro está afectado por PhytophthoraFroitos de cítricos con diferente grao de ataque de Phytophthora hibernalis

BUXO

Cylindrocladium buxicola

Están empezando a verse os primeiros síntomas desta enfermidade favorecidos polo incremento da humidade ambiental. Lembren que este é un fungo que, unha vez que infecta unha planta, non é sinxelo de xestionar polo que nesta época tamén pode aplicarse un tratamento preventivo cun funxicida de cobre. Ademais, para reducir a incidencia da enfermidade son obrigadas unha serie de medidas culturais como son retirar frecuentemente as follas secas, tanto as que se atopan sobre as sebes como as caídas ao chan, garantir no posible a ventilación das plantas e, no caso de facer algunha poda ou corta, desinfectar continuamente as tesoiras.

Síntomas moi incipientes de CylindrocladiumSíntomas de diferente intensidade de Cylindrocladium buxicola en Buxus sempervirens suffruticosaPara limitar la incidencia de la enfermedad deben eliminarse las hojas desprendidas y depositadas sobre las plantas

Cydalima perspectalis

Segundo nos informaron e tamén comprobamos nós nunha sebe, aínda quedan algunhas eirugas activas debido ás temperaturas que se rexistran e maila menor duración do día, que é un dos factores determinantes para que entren en hibernación. Polo tanto, nas sebes con síntomas recentes, aconséllase revisar os gromos para detectar posibles eirugas alimentándose e valorar así a conveniencia de aplicar un tratamento.

20180925_Vista parcial de sebe non tratada en PontevedraSintoma caracteristico de Cydalima cando a eiruga esta protexida

NOGUEIRA

Antracnose

Naquelas nogueiras que tiveran síntomas e danos provocados por esta patoloxía pode realizarse un tratamento con cobre á caída da folla para reducir a súa incidencia de cara ao ano próximo.

Síntomas de antracnose en árbore de NogueiraGnomonia Leptostyla - Síntomas en froito