Como se pode comprobar no resumo do estado fenolóxico (E.F.), nas observacións desta semana a diferentes viñas non podemos determinar cal é a fenoloxía nas viñas na variedade dominante, albariño. É certo que en xeral se está a iniciar a floración, pero hai diferencias non só entre comarcas senón tamén entre predios, plantas do mesmo predio e incluso a nivel dos acios da mesma planta ou no propio acio.

Na semana transcorrida desde a emisión do boletín anterior as temperaturas medias mantivéronse arredor dos 14-15 ºC, con máximas que só un ou dous días chegaron aos 20ºC nalgunhas das estacións de Meteogalicia consultadas, mínimas na contorna dos 10ºC e humidades relativas moi altas, aparte dunha precipitación total, rexistrada entre os días 8-9 e 12, superior ou moi superior aos 20 l/m ² , chegando incluso a un acumulado superior a 60 l/m ² nas estacións de Tomiño e As Eiras, ambas no Rosal. Como vimos dicindo desde hai semanas esta inestabilidade ten as súas consecuencias non só a nivel da fisioloxía da viña, retardándoa, senón tamén a nivel da evolución das pragas e enfermidades e incluso dos posibles tratamentos aplicados. Neste senso, esta semana fixemos o noso percorrido deténdonos en máis predios, e máis zonas diferentes, do que facemos habitualmente, observando tamén parcelas tratadas de variedades distintas do albariño. Con estes datos, e sen coñecer o plan de aplicacións da maioría destas outras viñas, o resumo das nosas observacións é o seguinte:

• - O luns día 11 atopamos as primeiras manchas na nosa viña de Areeiro. O venres 8 non había indicio delas pero, ao aparecer en catro follas diferentes, sospeitamos que foi ao longo da fin de semana cando se manifestaron.

Debido ás precipitacións e a outras circunstancias o preceptivo tratamento antimildio non se puido aplicar ata onte día 13, aínda que se deixaron a modo de testemuñas sen tratamento as filas contiguas ao captador instalado na viña. Malia esta información, as capturas de esporanxios desta semana foron baixando desde o día 7, data da anterior información fitosanitaria. Temos que dicir que non dispoñemos de datos do captador do Salnés por un fallo na placa electrónica do mesmo; con todo, dos datos dispoñibles ata que ocorreu o fallo, as capturas só eran lixeiramente superiores ás de Areeiro.

• - Do resto de predios, practicamente só na comarca do Salnés atopamos manchas novas, pero moi poucas e non sempre frutificadas. Tamén nesa comarca nalgún dos predios había zona de avance nas manchas antigas.

• - Tamén foi sobre todo no Salnés onde atopamos algúns acios afectados, en especial como é lóxico en plantas testemuña sen tratar pero tamén nalgunhas tratadas. Ademais, aquí atopamos o único gabián con presenza de frutificación.

• - Do resto de predios e comarcas, aínda que si se observaron esporadicamente algúns síntomas non ben controlados, as manchas estaban ben controladas e os acios, sos.

En definitiva e a modo de conclusión, en xeral o estado das plantas no relativo a esta enfermidade é bo e, coas temperaturas frescas/frías (mínimas incluso por baixo de 10ºC) que se prevén a curto prazo e a xa practica ausencia de precipitación, máis o efecto dos potenciais tratamentos efectuados ou que se están a dar, e o nivel de risco que nos da parte dos modelos matemáticos que manexamos, consideramos que pode seguir así. Con todo, e dado que a viña se atopa nun estado fenolóxico de elevada sensibilidade ao patóxeno, NON SE PODE DESCOIDAR A VIXILANCIA DOS VIÑEDOS, sobre todo naqueles predios onde existan síntomas non ben controlados e onde a protección teórica do anterior tratamento estea próxima a concluír, en especial se foi aplicado antes das choivas, pois como sabemos estas reducen ese tempo de protección.

Malia ter observado esta semana viñas de diferentes variedades, non atopamos síntomas de oídio en ningunha. É certo que a maioría dos predios estarán sendo tratados xa fronte este patóxeno, pero tamén as precipitacións de carácter forte que se deron por períodos estes días, non son favorables a este fungo ectoparasito. Con todo é preciso manter a vixilancia, máis se o viñedo ten variedades de elevada sensibilidade ao fungo.

Esta semana, sen dúbida a consecuencia da elevadísima humidade que temos esta primavera, con valores medios diarios que non baixan do 77-80% desde hai semanas, atopamos os primeiros síntomas nunha folla dunha variedade diferente do albariño e tamén, pero neste caso debido á condición de oportunista deste patóxeno, na zona seca por mildio dun acio de albariño.

Aínda que a curto prazo só se prevén precipitacións moi reducidas (2-3 días cun acumulados moi baixos e non todas as predicións) haberá que seguir pendentes, sobre todo nas viñas con danos por sarabia.

A situación observada nas viñas, malia ter visto esta semana maior diversidade delas, mantívose similar á da semana anterior: novo incremento, pero lixeiro, na presenza de manchas desta enfermidade nas follas e ausencia de síntomas en acio, incluso nos das plantas sintomáticas desde máis tempo. Manter a vixilancia.

Das nosas trampas só capturamos 4 machos de Lobesia botrana nunha trampa do Salnés. Con todo, atopamos na mesma comarca (non no mesmo predio) o primeiro glomérulo que miramos na campaña pero, curiosamente, a eiruga que contiña no interior era da especie Eupoecilia ambiguella, da que non recollemos macho algún na campaña.

Lembramos que, aínda que a curto prazo pode que non o fagan se as temperaturas se manteñen baixas, pronto debería ter lugar o nacemento das primeiras ninfas de Scaphoideus titanus , o vector da flavescencia dourada e que esta enfermidade non só é de declaración obrigatoria senón que hai que arrincar e destruír as plantas enfermas, e realizar, polo menos onde e cando o marque a Consellería, os tratamentos fronte ao transmisor.

Por outra banda, a semana pasada comentabamos que era recomendable a eliminación total e inmediata das plantas ou restos de plantas mortas que había nalgúns predios, pero non indicamos que tamén era precisa a súa destrución. Pois ben, esta semana atopamos máis dun viñedo onde si se arrincaran pero se deixaran a carón das viñas sas, o que é totalmente contraproducente, sobre todo coa elevadísima humidade que temos: hai que arrincalas e destruílas, e se non se pode facer de inmediato, ou ben hai que levalas fóra das viñas ou ben cubrilas completamente para evitar potenciais dispersións de patóxenos.

Finalmente, esta semana tamén observamos nunha viña do Rosal os primeiros síntomas confirmados de acariose, pero só nun par de follas das que recollemos na mostraxe.

Esta semana só destacamos a captura de 10 machos de Cydia pomonella na nosa trampa de feromonas de Areeiro, onde non facemos tratamentos para comprobar a evolución natural das poboacións para esta información fitosanitaria. Aínda así, sabemos que a situación pode ser diferente noutros casos, e por iso, coma en calquera cultivo, recomendamos a instalación de trampas e o seguimento en cada caso concreto. Polo demais, continúa habendo colonias de pulgón cincento nos gromos.

Seguimos sen capturas de machos de Cydalima perspectalis, a bolboreta do buxo, nas trampas que temos instaladas. Ademais, en xeral as plantas teñen bos brotes e sanos.