Debido ás choivas rexistradas é posible que non teñan tido moita oportunidade de aplicar estes tratamentos tan recomendables en zonas tan húmidas como a nosa, pero nestes días poden facer cando menos unha aplicación. A día de hoxe non hai coincidencia canto a probabilidade de precipitación a curto-medio prazo que anuncian as axencias meteorolóxicas, aínda que a maioría delas prevé que choverá algo entre a fin de semana e o inicio da semana próxima, pero en cantidades baixas, en principio insuficientes para producir o lavado dos produtos aplicados (tamén a día de hoxe as previsións apuntan a bo tempo para a semana seguinte, xusto despois das precipitacións previstas). Cando o fagan, lembren que a Unión Europea restrinxiu o uso dos produtos fitosanitarios que conteñan compostos de cobre a unha tasa de aplicación máxima de 4 Kg/ha/ano, polo que procuren calcular ben as doses e o volume de caldo.

A maioría dos agricultores xa terán feitas as podas pero para aquelas plantas que queden sen facelo lembren adoptar as boas prácticas que sempre recomendamos: desinfectar tesoiras de poda; podar en tempo seco e sen vento; tentar sanear as plantas eliminando ramas afectados por alteracións da madeira ata alcanzar unha zona limpa e sa; retirar, queimar ou destruír os restos da poda, sobre todo os de maior diámetro...

No noso laboratorio e tamén xa nalgunhas sebes de zonas cálidas estamos observando que as primeiras eirugas están saíndo da hibernación. De momento sucede de xeito moi puntual no exterior pero é de esperar que coas temperaturas que estamos a ter empecen a observarse tamén os primeiros síntomas.

Coa calor e o sol que está a facer é de esperar que nestes días empecen a verse de xeito máis frecuente as características procesións de enterramento desta praga (xa as observamos puntualmente na segunda quincena do mes pasado). Polo tanto temos que lembrarlles que as eirugas que conforman as procesións teñen pelos urticantes que poden producir reaccións alérxicas e inflamatorias non só ás persoas senón tamén aos animais domésticos, polo que é recomendable afastarse das masas de especies sensibles, non pasear cas mascotas nesas áreas e, en caso de observar as procesións, non acercarse nin manipular as eirugas.