Como ben é sabido, esta semana choveu practicamente todos os días, con precipitacións que non foron dunha contía moi elevada pero que si foi mantida ao longo das horas, de xeito que a humidade relativa do aire estivo ben alta, con medias de 80-100% cada un dos días transcorridos desde o pasado venres día 14, e incluso tamén os dous últimos días sen apenas precipitación. Amais, as temperaturas finalmente foron suaves, e nas primeiras horas sen luz algunhas xornadas mantivéronse incluso na contorna dos 16-17ºC, moi propicias para a frutificación do fungo. Deste xeito, o captador da nosa parcela de Areeiro, situado nas plantas testemuña, recolleu unha cifra moi alta de esporanxios, sobre todo o 17 e o 18 (máis de 600/m³ de aire), e o mesmo o situado no Salnés, que está nunha viña tratada pero na que xa estaba a concluír o período de protección teórico do tratamento anterior.

As condicións tan húmidas que houbo favoreceron que nas viñas abandonadas seguiran aparecendo novas manchas en abundancia e con frutificación incipiente.

Pero tamén nalgúns predios se viron síntomas en acio, e do mesmo nos informaron varios viticultores e algún técnico que colabora con nós. Nalgúns destes casos eran os primeiros síntomas observados na campaña (caso da nosa viña do Salnés onde temos o captador e onde xa non había protección do tratamento anterior), pero noutros seguían a ser consecuencia de infeccións mal controladas desde o inicio ou dun mal mantemento da frondosidade da viña ou da altura da cuberta vexetal que hai baixo as cepas. Amais, tamén se puido ver algunha mancha nova neste tipo de viñas.

As diferentes axencias meteorolóxicas consultadas prevén que o tempo vai mellorar (xa o está a facer, de feito) pola crecente influencia do anticiclón das Azores, pero novamente advirten de que as previsións poden cambiar. No momento da redacción deste boletín (tarde do xoves 20) anuncian, en xeral, tempo seco con nubes e claros, pero algunhas dan unha pequena  precipitación un ou dous días. As temperaturas, segundo indican, serán altas ou moi altas, tamén as mínimas, e os ventos de dirección variable, algúns días con refachos próximos a 50 Km/h.

Despois das chuvias xa se terán renovado os tratamentos antimildio nos predios que estaban próximos a quedar sen protección e/ou naqueles onde apareceron acios afectados. Onde non se fixera, haberá que proceder, pero prestando moita atención aos ventos, que non deben superar os 11 Km/h. Onde xa se fixera, hai que revisar moi ben o estado da enfermidade, en especial si os ventos que veñen nos próximos días son húmidos ou si continúa a rexistrarse unha moi elevada humidade relativa, dado que a previsión de altas temperaturas nocturnas é xeral.

Nestes momentos é preciso coidar moi ben que a vexetación das cepas non sexa excesiva para favorecer a aireación dos acios

Malia ter habido condicións favorables, os tratamentos que se están a realizar están a controlar perfectamente as infeccións, cando menos nas viñas que revisamos nós. Tamén é certo que non vimos síntomas nas plantas testemuña que mantemos sen intervención de ningún tipo na campaña. Manter a vixilancia, en especial nas variedades máis sensibles.

Non vimos máis síntomas da enfermidade, pero hai que manter a vixilancia e procurar eliminar vides abandonadas próximas ás viñas en produción.

De momento as capturas de adultos de Empoasca vitis (mosquito verde) nas trampas son pequenas. Con todo, e como xa avisamos o pasado luns día 17, é o momento de aplicar o primeiro tratamento contra o cicadelido transmisor da flavescencia dourada nas comarcas fronteirizas con Portugal afectadas pola loita obrigatoria que se estableceu pola detección do patóxeno. Desde o pasado mes de maio xa se está a producir o nacemento e desenvolvemento das formas xuvenís e agora xa poden infectar plantas sas no caso de ter adquirido o fitoplasma causante da enfermidade de plantas infectadas do ano anterior. Os tratamentos contra S. titanus son obrigatorios na denominada Zona Demarcada (que se pode consultar en: https://www.xunta.gal/dog/Publicados/2023/20231117/AnuncioG0426-101123-0001_es.html), pero moi convenientes en todo este área para tentar de limitar ao máximo a extensión da enfermidade. As materias activas autorizadas polo Ministerio son deltametrin 1.5, 1.57 e 2.5%, acetamiprid 20%, lambda cihalotrin 1.5, 2.5 e 10%, tau-fluvalinato 24% e Beauveria bassiana (cepa ATCC 74040) 2.3%.

Na viña onde a semana anterior observaramos síntomas de acariose, e confirmaramos á lupa a presencia do ácaro, notamos un lixeiro avance nos síntomas.

As condicións climáticas húmidas destes días favorecen que aparezan síntomas desta enfermidade, e para evitar que os froitos rachen será necesario tratar.

Na nosa parcela de seguimento, que mantemos sen tratamentos para comprobar a evolución natural do voo do insecto, as capturas superaron esta semana o limiar de tratamento. Pero como saben, sempre insistimos na instalación de trampas en cada parcela concreta como medio de racionalizar e optimizar o control.

Lembren que as feridas derivadas dun mal control deste insecto non só deprecian directamente aos froitos senón que tamén favorecen a instalación de fungos de podremia sobre eles.