Do mesmo xeito que dixemos no boletín anterior, tamén na revisión desta semana ás viñas notamos unha fenoloxía heteroxénea a nivel de comarca, de predios, dentro de cada predio e mesmo tamén a nivel de planta. Aínda así, en todos os casos está arredor da floración e, co tempo seco e solleiro que, en xeral, se anuncia para os próximos días, é de esperar que se vaia homoxeneizando e sucedéndose sen incidencias graves no relativo á climatoloxía.

Ao longo da semana transcorrida desde a emisión do boletín anterior, houbo precipitacións case todos os días, a humidade relativa do aire foi elevadísima, con valores medios superiores ao 80% e tamén houbo varias horas de humidade foliar cada xornada, normalmente por riba de oito. Estas condicións son moi favorables ao patóxeno e só se viron limitadas ata certo punto por unhas temperaturas mínimas que en xeral se mantiveron por baixo dos 12ºC, aínda que si houbo xornadas en que superaron este valor sempre tendo en conta que son os datos das estacións meteorolóxicas e que dentro do microclima das viñas hai variacións. De feito, esta semana recolleuse o maior número de esporanxios nos captadores que temos instalados polo proxecto PLASMOWINE nunha das nosas parcelas de seguimento do Salnés (en Ribadumia) e entre filas testemuña (sen tratamento algún para seguir a evolución natural do patóxeno) da viña de Areeiro:

Canto á situación observada nas viñas, como se pode entrever da gráfica correspondente ás plantas testemuña de Areeiro, nestas plantas e tamén nas viñas abandonadas de distintas variedades que atopamos nos camiños e bordos de predios puidemos observar manchas en formación con abundante frutificación e tamén acios sintomáticos.

Canto ás viñas tratadas, a situación máis xeral é de apenas algún síntoma moi illado nalgunha folla dispersa das parras/espalleres e/ou só algún localizado nos cupóns próximos ao solo se non están retirados, ou tamén ausencia total de síntomas nalgúns predios.

Pero tamén sabemos de viñas que, malia levar xa unha cantidade inxente de aplicacións antimildio (ata nove, segundo nos informaron) aínda presentan ataques moderados, con manchas novas, zonas de avance nas antigas e/ou danos en acio. Os predios destas características dos que puidemos coñecer o historial levan arrastrando contaminacións non controladas desde a aparición dos primeiros síntomas, ben por unha inadecuada elección do funxicida, ben por non ter sido dado nas mellores condicións ou por non ter intervido a tempo.

As diferentes axencias meteorolóxicas consultadas predín para os próximos días ceos con nubes e claros, certa precipitación para sábado e/ou domingo segundo a axencia (se non, predín néboas), ventos maioritariamente do norte e temperaturas lixeiramente por baixo das normais para o momento do ano ao inicio e máis habituais cara o final. Con este prognóstico, e considerando que en todas as viñas se terán renovado os tratamentos nestes días, aconsellamos manter a vixilancia, en especial nos predios con infeccións mal controladas desde o inicio. Se froito das pertinentes revisións se comproba que continúan aparecendo síntomas, será preciso renovar o tratamento pero se cambian de funxicida soliciten un que teña diferente modo de acción do anterior para previr a aparición de resistencias.

Este fungo prefire unhas temperaturas elevadas para desenvolverse, e as mínimas frescas que estamos a ter non lle son o máis favorable. Amais, os tratamentos antimildio con produtos con actividade fronte a este patóxeno parecen estar contendo ben as infeccións. Con todo, os síntomas desta enfermidade poden aparecer tempo despois da infección e por iso hai que seguir mantendo a vixilancia, en especial nos predios onde soe aparecer nas diferentes campañas ou naqueles que teñan próximas viñas abandonadas.

Coas choivas reiteradas desta primavera, están a aparecer en certos predios, pero de xeito bastante puntual, algunhas follas coa necrose característica deste patóxeno. Porén, esta sintomatoloxía non soe xerar problema algún e por iso non soe requirir tratamento. Non obstante, as choivas rexistradas poden provocar que os capuchóns florais non se desprendan ben dos acios en formación, como observamos na revisión desta semana, e sobre os restos secos pode instalarse o fungo. Si como indican as predicións meteorolóxicas o tempo para a semana se mantén seco en xeral, non debería haber problemas, pero como hai unha elevada humidade relativa e se prevé certa precipitación para a fin de semana, hai que vixiar si finalmente se desprenden ou non.

Despois deste período de choivas, e considerando que se anuncia un incremento de temperaturas, será necesario aplicar un tratamento fronte a este patóxeno para evitar danos aos futuros froitos, en especial de variedades sensibles.

Como xa dixemos hai unhas semanas, despois das choivas e coa subida de temperaturas que se prevé para a semana haberá que renovar os tratamentos fronte a este patóxeno, que se verá favorecido polo estado frondoso das plantas e pola evaporación da auga do solo.

Aínda non capturamos ningún adulto nas trampas que temos instaladas, e si miramos algunhas crisalides. 

Na trampa que temos instalada en Areeiro, o número de machos capturados experimentou un crecemento considerable, pero non ocorreu o mesmo na que temos en Pontecaldelas. É importante que cada persoa instale trampas nos seus soutos/plantacións para comprobar o estado das poboacións en cada caso concreto. Lembren que esta especie pode provocar a caída prematura dos ourizos, e reducir así a colleita.