Situada entre os lugares da Sobreira e Zancande (Meis, Pontevedra), o predio toma o seu nome da capela que, dedicada á virxe da Saleta, mandou levantar entre 1863 e 1870 o coronel Severo Pérez Cardecid, natural de Cambados. No seu interior consérvanse un retablo de 1870, realizado polo taller compostelán de Manuel Magasiñas, unha bóveda policromada coa representación das armas dos Pérez Cardecid, Rosales e Losada e unha fachada brasonada de gran beleza.

Contiguas a esta capela mantéñense algunhas dependencias da antiga casa de labranza (hórreo e pombal), que poden considerarse como unha unidade arquitectónica, posto que a actual vivenda é unha casa moderna, algo apartada.

En 1968 chegou a Galicia o británico Robert Gimson buscando un lugar onde poder practicar a súa gran paixón: a xardinería. Coa axuda da súa esposa Margaret foi transformando o terreo ata convertela nun excepcional xardín botánico. Ao matrimonio atribúeselle a recuperación da tradicional romaría en honra á virxe da Saleta que se celebra cada ano na capela.

Ao longo e ancho de cinco hectáreas de superficie esténdese este xardín de tipo inglés, deseñado pola arquitecta paisaxista Brenda Colvin, que inclúe a parte dedicada ao bosque, onde alternan carballos, eucaliptos e sobreiras que rodean o pombal, de planta octogonal. Atoparemos tamén especies orientais coma rododendros e azaleas, protáceas e mirtáceas australianas, ericáceas suramericanas; todas elas debidamente clasificadas e etiquetadas, mostra do labor dun científico de primeira orde.

O interese dos Gimson pola camelia fíxolles obter merecidos recoñecementos, coma o Premio Camelia de Ouro e o Premio Especial Antonio Odriozola. Variedades de camelia branca, rosa, vermella, violácea, xaspeada, reticulata... esténdense por este xardín e ofrécennos espectaculares abanos de coloridos pétalos.