O parque municipal do Castro, en Vigo, está situado nun alto en pleno centro da cidade e desde alí pódese contemplar unha fermosa panorámica do porto e da ría. Nel deixaron a súa pegada os castreños,que se asentaron neste monte desde finais do século i, e os romanos, no século iii; mostra diso son os restos que aínda están presentes no parque.

Durante a Idade Media instalouse alí o castelo do Penço, pertencente á mitra compostelá. Entre os anos 1656 e 1665 foi derrubado para levantar o castelo de Santa María do Castro, o castelo de San Sebastián e o recinto amurallado que os unía.

Este lugar foi testemuña das invasións piratas inglesas (1585-1589) e turcas (1617), da batalla de Rande (1702) e tamén foi refuxio do exército na súa retirada do ataque inglés en 1719.

A finais do século xix derrubáronse as antigas murallas defensivas da cidade, o que afortunadamente non afectou a fortaleza do Castro, cuxos restos permanecen hoxe en día como exemplo típico da arquitectura militar da época. Destaca polo seu gran valor cultural e paisaxístico.

O parque constitúe un verdadeiro xardín botánico situado no centro da cidade de Vigo; posúe moitas especies exóticas, de gran tamaño e dun importante valor ornamental.

Para chegar a esta contorna podemos seguir a senda botánica das frondosas deste parque, que sinaliza un percorrido por máis de trinta especies diferentes. Esténdese principalmente polo lado meridional e polo paseo Rosalía de Castro, que rodea o centro do parque.

Destaca a súa importante colección de camelias, distribuídas en varias zonas do xardín, a maior parte delas de orixe portuguesa, de cultivares coma ‘Jane Andresen', ‘Angelina Vieira', ou ‘Pomponia Estriata Portuensis', entre outras.