Estación Fitopatolóxica Areeiro

O pasado 22 de outubro visitou a Estación Fitopatolóxica Areeiro (EFA) unha delegación do Instituto Politécnico de Leiría (Portugal), composta por Rui Pinto Pedrosa, Celso Alves e Joana Silva. Ambos os centros colaboran como socios no proxecto europeo Interreg Atlantic Area BEAP-MAR, "Bioeconomía azul no espazo atlántico: novos produtos a partir de organismos mariños". No encontro estivo presente o deputado da EFA Javier Tourís.

Durante a visita, os socios portugueses proporcionaron mostras recollidas en diferentes áreas de Portugal, que serán analizadas nos laboratorios da EFA e que son unha contribución fundamental para avanzar no obxectivo principal do proxecto: a valorización de organismos mariños pouco explotados comercialmente, como microalgas, macroalgas, fungos mariños e esponxas para desenvolver produtos e compostos innovadores, sostibles e de alto valor engadido.

Con este proxecto búscase, ademais, establecer novas metodoloxías que permitan aplicar estes organismos mariños en diferentes sectores industriais para contribuír á innovación e ao crecemento da bioeconomía azul no espazo atlántico.

Entre os seus obxectivos específicos inclúense:

• Reforzar a competitividade do tecido empresarial do espazo atlántico.
• Avaliar tecnoloxías avanzadas mediante probas de produto.
• Mellorar a capacidade das empresas da rexión para deseñar modelos de negocio sostibles e adaptados ao mercado.
• Incrementar o coñecemento sobre organismos mariños específicos do espazo atlántico, como microalgas, macroalgas, fungos mariños e esponxas.
• Potenciar o desenvolvemento do sector da bioeconomía azul.

A través destas liñas de acción contribúese á promoción dunha economía mariña innovadora, sostible e competitiva, en beneficio das comunidades e do medio.