Estación Fitopatolóxica Areeiro

O 3 de agosto de 2022 os laboratorios integrados no Plan de calidade da Estación Fitopatolóxica Areeiro (seccións de Bioloxía Molecular, Edafoloxía e Fitopatoloxía) tiveron a segunda auditoría de seguimento de certificación realizada pola empresa externa AENOR baixo a norma de aplicación UNE-EN ISO 9001:2015, segundo o expediente 2005/0771/ER/01 e co número de certificado ER-1513/2005.

Os obxectivos da auditoría foron:

• Determinar a conformidade do sistema de xestión da organización ou empresa auditada cos criterios de auditoría
• Avaliar a súa capacidade para cumprir cos requisitos legais, regulamentarios e contractuais aplicables
• Avaliar a súa eficacia para cumprir os obxectivos especificados e, cando corresponda, identificar posibles áreas de mellora da organización ou empresa

Esta avaliación realizouse para as actividades incluídas actualmente no alcance:

• Detección e identificación de organismos fitopatóxenos: fungos, oomicetos, fitoplasmas e bacterias por técnicas moleculares (PCR, PCR-RFLP, NESTED-PCR, MULTIPLEX-NESTED PCR e SECUENCIACIÓN)
• Realización de ensaios de eficacia de funxicidas in vitro
• Mostraxe, análise e identificación de Bursaphelenchus xylophilus por morfoloxía e técnicas moleculares
• Detección de virus da vide (GLRV I, II, III; GFLV; ArMV e GFKV), virus hortícolas e bacterias Xylophilus ampelinus, Xylella fastidiosa da vide, Xylella fastidiosa de leñosas e ornamentais pola técnica ELISA
• Análise fisicoquímicos en solos (pH, catións, materia orgánica, fósforo e aluminio)

Tras a auditoría informouse, por parte de AENOR, da avaliación CONFORME e o equipo auditor destacou como puntos fortes do noso sistema:

• O alto grao de colaboración e participación do persoal auditado
• A competencia técnica do persoal auditado
• O nivel de satisfacción que se obtivo nas enquisas

Parabéns a todo o persoal polos bos resultados alcanzados.