Reunión dos investigadores do proxecto europeo Horizonte 2020 "Pre-HLB: Preventing HLB epidemics for ensuring citrus survival in Europe" para o seguimento e coordinación das tarefas e dos obxectivos do proxecto
Os días 11 e 12 de maio tivo lugar na Estación Fitopatolóxica Areeiro (EFA) unha reunión de coordinación para continuar co seguimento e coa evolución dos obxectivos recollidos no proxecto europeo Horizonte 2020 "Pre-HLB: Preventing HLB epidemics for ensuring citrus survival in Europe" (Previr as epidemias HLB para asegurar a supervivencia dos cítricos en Europa), no que colabora este servizo da Deputación de Pontevedra.
Con motivo deste encontro, visitaron estas instalacións os investigadores Leandro Peña García (CSIC Valencia e coordinador do proxecto), Alberto Fereres Castiel (ICA-CSIC Madrid, responsable do Grupo de Insectos Vectores de Patóxenos Vexetais) e José Eduardo Belda (director I+D de Koppert España S. L.). A EFA colabora no proxecto a través do seu Laboratorio de Artrópodos e Control Integrado, no marco dun convenio establecido entre a Deputación de Pontevedra e o Consello Superior de Investigacións Científicas (CSIC), no que ten encomendadas as seguintes tarefas:
- 1. Cría masiva do insecto Trioza erytreae . O obxectivo principal será a produción de adultos de T. erytreae en número suficiente e de forma periódica para realizar os ensaios previstos no proxecto "Pre-HLB". Os devanditos ensaios implican traballos de laboratorio e de campo e suporán conseguir unha cría estable e continua do insecto sobre limoeiros.
- 2. Estudos sobre o ciclo de vida e os limiares máximos e mínimos de desenvolvemento de T. erytreae . Estase a estudar a taxa de desenvolvemento, supervivencia, lonxevidade e reprodución (cálculo das taxas de fecundidade e fertilidade) do insecto a diferentes temperaturas e humidades relativas. Doutra banda, determinaranse os limiares máximo e mínimo de temperaturas e humidades para o seu desenvolvemento, calculando as táboas de vida pertinentes.
- 3. Ensaios de preferencia de T. erytrae a diferentes especies vexetais . Estudarase o rango de hóspedes preferido mediante ensaios de libre elección cunha selección de diferentes especies de rutáceas ademais doutros hóspedes potenciais.
- 4. Eficacia en laboratorio de insecticidas biolóxicos . Neste caso estanse a realizar diferentes ensaios de control con fungos entomopatóxenos para determinar a súa actividade contra a praga, o seu comportamento dose-resposta e a súa persistencia, co obxectivo de integralos en estratexias de manexo da praga/HLB.
Xa en Areeiro, o noso deputado delegado Manuel González Martínez deulles a benvida. Despois, após comentar brevemente o estado dos estudos, acordaron continuar o desenvolvemento do proxecto e comezar a redactar publicacións científicas e comunicacións para congresos, ademais de emitir notas de prensa, pois xa se están a producir resultados.