En xeral, as condicións climatolóxicas que se produciron durante esta semana foron de certa inestabilidade, e por iso houbo unha elevada humidade no ambiente, representada por choivas, humidade foliar ou humidade relativa. Estas condicións húmidas unidas a unhas temperaturas nocturnas bastante altas, compatibles algúns días coas condicións para as infeccións secundarias, provocaron a aparición de manchas novas nas plantas testemuña que mantemos sen tratamento en predios de todas as comarcas e tamén nas vides de variedades pouco sensibles que hai nos muros e ao longo das vías de acceso a certas parcelas.

Tamén algunhas persoas (técnicas e viticultoras) nos informaron de predios con infeccións non controladas e xa síntomas en acios e pampos. Porén, nas viñas que revisamos nós esta semana (as habituais da nosa rede máis outras ao azar) foi ben notoria a protección dos funxicidas, pois as manchas antigas non presentaban unha frutificación viable nin zonas de avance e só en determinados predios observamos algunha mancha nova dispersa en plantas ás que probablemente non chegaran ben os produtos. Ben é certo que, polo de agora, a concentración diaria de esporas que recollemos no captador da nosa viña de Areeiro (o que temos en Ribadumia non está funcionando ben) dentro do proxecto PLASMOWINE é baixa, aínda que tamén o é que esta última semana tivemos os valores máis elevados de toda a campaña.

Con todo, parece que a curto prazo vai continuar o tempo inestable e as temperaturas nocturnas elevadas, polo que será necesario continuar en alerta ante a potencial aparición de máis síntomas, en especial naquelas viñas nas que estea próximo a concluír o período de protección teórico do tratamento anterior. Nestes casos será preciso renovar as intervencións. Xa a medio prazo as predicións a día de hoxe apuntan cara unha maior estabilidade e un descenso nos rexistros mínimos; de ser así o risco de novas infeccións diminuirá.

Ao marxe das referidas a semana anterior, tamén esta semana observamos os primeiros gromos rotos polo vento nalgunhas viñas. Se a situación é coincidente, convén eliminalos para evitar que coa humidade se instalen fungos oportunistas.

Nas plantas habituais do noso seguimento non apareceron aínda os primeiros síntomas do fungo. Non obstante, nas variedades máis sensibles que soen ter problemas polo patóxeno todos os anos pódese aplicar un tratamento debido á climatoloxía cálida e húmida que temos.

Vimos esta semana as primeiras colonias deste áfido en Areeiro. Non iamos tratar, así que o que fixemos foi eliminar e destruír os gromos danados. En calquera caso, é preciso iniciar a vixilancia, pois os seus ataques poden encarrapuchar as follas e, o que é máis grave, deformar os froitos.

Esta semana recollemos un novo adulto na trampa que temos instalada nas maceiras de Areeiro.

Están a aparecer os primeiros síntomas debido ás condicións húmidas e quentes desta tempada. É conveniente aplicar un tratamento fronte a enfermidade.

Tamén as condicións meteorolóxicas destas semanas favorecen aos patóxenos habituais destas plantas. É preciso aplicar un tratamento unha vez finalicen as precipitacións, cando tamén continuará a evaporación da humidade do solo.

A semana anterior comentabamos que xa non atopabamos eirugas nas sebes que vixiamos, só crisálides. Pois ben, nas revisións desta semana aínda apareceu algunha eiruga ben desenvolvida e na poboación mantemos no laboratorio continúana nacer os primeiros adultos.