INFORMACIÓN FITOSANITARIA 08 de abril
VIÑA
Mildio
As temperaturas tan baixas que se rexistraron durante a semana non favoreceron o crecemento dos gromos, que seguen a estar estacionarios e pouco desenvolvidos en xeral, aínda que loxicamente hai excepcións e, como é normal, os máis longos están situados en cada viña ao final da vara.
Con todo, desde onte día 7 xa subiron as temperaturas nocturnas ao nubrarse os ceos. Con esta situación, unicamente se recolleron, entre o xoves 31 de marzo e o mércores 6 de abril, 4 esporanxios de mildio no captador que xa temos instalado en Areeiro. As choivas que se están a producir desde hoxe venres, que segundo as previsións consultadas poderán rexistrarse ata martes ou mércores, unidas a unhas temperaturas diúrnas e nocturnas suaves, favorecerán non só o desenvolvemento dos gromos senón tamén, con toda probabilidade, a presenza de máis esporanxios no aire. Faremos unha visita ás viñas entre luns e martes para volver publicar a situación observada o mércores día 13. Entre tanto, convén ir vixiando a viña, revisando a maquinaria de tratamentos e ir adquirindo os produtos que se vaian dar na primeira aplicación.
Outras incidencias.- As temperaturas tan baixas que se rexistraron estes días, con valores baixo cero nalgúns casos, queimaron os gromos nalgunhas viñas. Nestes casos haberá que estar pendentes á evolución da planta nos próximos días (pode brotar por outras xemas, ser recomendable -ou no- unha poda...) e á posible aparición de síntomas de botrite nos restos secos.