Este ano incorporamos á nosa rede de seguimento algunhas parcelas pertencentes á IXP Ribeiras do Morrazo. Tanto aos seus propietarios como aos das fincas do resto de comarcas (aqueles que levan con nos moitos anos e outros novos), grazas pola confianza

En xeral, as temperaturas que se deron durante as noites e as primeiras horas da mañá do mes de abril, momento desde o que podemos considerar que hai gromos ben desenvolvidos, son frescas (valores medios ao redor de 7-9 º C na maioría das estacións). Polo tanto non foron favorables ao desenvolvemento do fungo. Sen embargo, é certo que, especialmente a noite do día 14, houbo rexistros elevados durante horas que se acompañaron de xeito intermitente por humidade foliar e/ou humidade relativa por riba do 90%. Con esta situación, a día de hoxe o desenvolvemento teórico do mildio segundo Goidanich ronda o 30-40% nas diferentes estacións consultadas da DO Rías Baixas, só acadando o 56-58% en Bueu-Cabo Udra e Cangas Porto da IXP Ribeiras do Morrazo.

Na visita realizada onte día 16 a parte das parcelas da nosa rede non observamos os primeiros síntomas da enfermidade, nin tampouco ata este momento nos informaron de que teñan aparecido noutras fincas. Aínda así, as previsións das diferentes axencias meteorolóxicas, que ben é certo que non coinciden estritamente canto aos períodos de precipitación previstos para os próximos días, anuncian que, salvo a fin de semana, vai haber tempo novamente  húmido e con choivas de xeito intermitente ou continuo, aínda que tamén prevén temperaturas bastante baixas. Tendo en conta estes datos, e o momento sensible da fenoloxía da planta, se non fan revisións periódicas aos viñedos, podería ser interesante protexer as viñas de xeito preventivo antes de que se inicie este período de precipitacións. No caso de facerse seguimentos na procura da primeira mancha (que soe, aínda que non sempre, aparecer nas follas da base do gromo), estes deben ser máis ou menos reiterados segundo se confirmen (ou non) as previsións meteorolóxicas.

Nos inicios da campaña poden observarse síntomas que semellan aos producidos pola acariose pero que en realidade son consecuencia das condicións ambientais. Así, nas mostras que recollemos nas parcelas de seguimento e noutras que visitamos non atopamos exemplares observando as follas no laboratorio. Nalgunhas fincas, pola súa parte, si se aprecian síntomas de  erinose, pero sen importancia.

Hai viñas, sobre todo na área de influencia da IXP Ribeiras do Morrazo, que presentan danos nas follas e rotura de gromos polos efectos destes factores ambientais. Non son moi xeneralizados pero nas fincas onde se presenten á conveniente aplicar un produto que leve folpet cando fagan a primeira intervención fronte ao mildio.

De momento non temos observado síntomas, pero naquelas plantas de variedades sensibles que chegan a ter danos na froita en todas as campañas pode aplicarse un tratamento preventivo pensando no período de humidade elevada e continua que, segundo parece, vai vir despois da fin de semana. Ademais, procuren elixir un funxicida que leve unha materia activa cicatrizante (tipo captan) para protexer as feridas nas follas que se observan nalgunhas zonas.

Esta enfermidade é endémica na nosa zona polo que hai que facer tratamentos continuados en tempo húmido para reducir os danos que poden causar, tamén aos froitos.

Na maioría das zonas apenas quedan xa eirugas (que están a crisalidar) e aínda non naceron os primeiros adultos, nin sequera nas poboacións que mantemos en condicións de laboratorio.

Está a ter lugar a  brotación e por tanto é o momento idóneo para aplicar un tratamento fronte a este ácaro, que causa a caída prematura dos casulos ("capullos"). Ademais, lembren que os botóns florais caídos ao chan deben ser eliminados para limitar a incidencia do ácaro.

Estas plantas ornamentais son moi sensibles a esta enfermidade, e por iso xa a nestes momentos poden observarse síntomas moi evidentes que as choivas que caen non frean, polo que é aconsellable aplicar un tratamento.

Co tempo húmido haberá que prestar moita atención á aparición de síntomas desta enfermidade ou, se non se realiza unha vixilancia do cultivo, será conveniente tratar.

Detectamos os primeiros individuos adultos nesta campaña sobre plantas xa ben desenvolvida