Este ano incorporamos á nosa rede de seguimento algunhas parcelas pertencentes á IXP Ribeiras do Morrazo. Tanto aos seus propietarios como aos das fincas do resto de comarcas (aqueles que levan con nos moitos anos e outros novos), grazas pola confianza

As mesmas circunstancias climatolóxicas ás que acabamos de referirnos, é dicir, temperaturas frescas durante a noite e primeiras horas da mañá e os ventos do norte, ademais de valores medios de humidade relativa bastante moderados (ao redor do 70-80%), non foron especialmente favorables ao desenvolvemento do fungo. Tamén é certo que algúns viñedos xa recibiron o primeiro tratamento e aínda están protexidos. Sen embargo, houbo episodios de sarabia localmente, e tamén momentos de humidade foliar, que favorecen ao patóxeno. Así, observamos as primeiras manchas de aceite en fincas especialmente abrigadas e sensibles. É máis, en dúas delas, que foron tratadas os días 20 e 26, respectivamente, de xeito preventivo e polo tanto antes da detección da primeira mancha, apareceron novos síntomas en folla, e por iso recomendouse renovar a intervención na primeira delas, utilizando unha materia activa con diferente modo de acción. Este feito obríganos a incidir unha vez máis na importancia de verificar que os tratamentos cumpriron o seu obxectivo, e para iso é preciso revisar periodicamente os viñedos.

Para os próximos días, as diferentes axencias meteorolóxicas consultadas prevén precipitacións, unidas a unha lixeira subida de temperaturas mínimas, a partir do martes día 7 (algunha incluso da choiva xa o propio luns) e polo menos ata xoves 9 ou venres 10, polo que entramos nun período de maior risco de mildio. Estas previsións obrigan a renovar as intervencións naqueles viñedos onde xa se detectara a mancha e nos que está próximo a concluír o período de protección teórico do tratamento anterior, e a estremar ao máximo a vixilancia onde aínda non se atoparan os primeiros síntomas e non se tivera realizado a primeira intervención.

Tamén nestes momentos é IMPRESCINDIBLE o control da vexetación adventicia para evitar que reteña humidade e dificulte a aireación na contorna das viñas. Parte desta vexetación está en floración nestes momentos, co que non é difícil que as inflorescencias acaden unha boa altura

Seguimos sen observar síntoma algún da enfermidade, nin sequera nas variedades máis sensibles e/ou onde todos os anos hai presenza do fungo, que é onde se debe centrar a vixilancia.

Non observamos síntomas en ningunha parcela (nin sequera naquelas onde hai danos mecánicos por vento e/ou sarabia), debido á moderada humidade relativa e aos ventos secos do norte. Porén, a partir da semana próxima haberá que estar pendentes nas fincas afectadas se, como se anuncia, hai precipitacións.

Aínda non detectamos as primeiras manchas en ningunha finca, xa sexa da nosa rede de seguimento ou das que visitamos nos nosos percorridos. Tampouco as condicións climáticas destes días foron favorables, pero tamén haberá que incrementar a vixilancia despois das precipitacións previstas para a próxima semana.

Nesta semana xa non capturamos ningún adulto de Eupoecilia ambiguella na trampa da parcela do Morrazo onde se recolleran na revisión anterior. Pola súa banda, as capturas de Lobesia botrana permanecen en niveis moi baixos.

Continúa habendo síntomas de erinose en case todas as fincas, e tamén os síntomas que poden apuntar á presenza de acariose pero que en realidade son debidos a cambios continuados nas condicións ambientais, temperaturas sobre todo.

Como xa temos referido, unha semana máis houbo precipitacións en forma de sarabia nalgunhas zonas que provocaron lesións nos gromos, rotura dos mesmos e tamén rachos de follas. Ademais, foi xeneralizada a presenza de ventos moderados e mesmo fortes que, co escaso desenvolvemento da vexetación, contribuíron á perda dalgúns gromos. Como se sabe, as feridas de calquera natureza son portas de entrada de certos patóxenos, polo que haberá que estar pendentes despois das choivas que se aveciñan.

As condicións climáticas desta semana non foron moi favorables ao desenvolvemento do fungo, pero sen embargo atopamos os primeiros síntomas da enfermidade na nosa finca de Areeiro. Simplemente afectaban a unha soa folla dunha planta, pero para a semana anúncianse precipitacións, polo que en variedades especialmente sensibles aconséllase aplicar un tratamento.

Tamén nesta semana vimos algúns gromos con síntomas, pero polo menos nas nosas parcelas non tiñan moita incidencia

Nesta semana xa se superou o limiar de tratamento na nosa finca de Areeiro con 4 adultos na trampa, pero non imos tratar para poder seguir o ciclo natural da praga.

Do mesmo xeito que no caso da maceira, tamén na nosa finca atopamos síntomas dispersos desta enfermidade.

Tamén nalgunhas árbores atopamos as manchas producidas por este fungo que sen dúbida se incrementarán coas choivas que se prevén.

Nas trampas que temos instaladas nas cerdeiras da nosa finca de Areeiro incrementouse o número de adultos recollidos nas trampas que temos instaladas. Lembren que as larvas desta especie aliméntanse dos froitos de diferentes especies (cerdeira, amorodo, kiwi, froitas do bosque, etc.), e poden provocar secado dos mesmos aparte podremias sobre eles. Para reducir o número de adultos e evitar así a posta de ovos na froita, poden instalar nas árbores trampas de captura caseiras cunha botella de plástico con buracos de ao redor de 5 mm onde botarán vinagre de mazá. Non son trampas específicas, e por iso capturarán máis especies.

Desde que emitimos a anterior información fitosanitaria (venres 26 de abril), recibimos numerosas consultas de toda Galicia referindo graves danos nas plantas e a presenza de numerosas eirugas aínda a pesar de ter tratado. Moitas veces a causa desta problemática é que os tratamentos non foron aplicados de xeito correcto porque, lembren, deben ser aplicados a presión e parándose moito para que teñan eficacia.

Na información publicada o día 17 de abril falabamos de que era o momento idóneo para aplicar un tratamento fronte a este ácaro. Pois ben, aínda están a tempo de facelo xa que aínda hai crecemento de gromos nalgunhas camelias e estamos a verificar que en moitas plantas as poboacións son moi elevadas.