O tempo seco e as temperaturas elevadas destes días non favoreceron a aparición de síntomas nas plantas, e de feito só observamos algunhas manchas de aceite de recente aparición sobre follas tenras e pampos dalgunhas plantas testemuña. Finalmente, a estabilidade climática destes días freou a aparición de síntomas a consecuencia das precipitacións (escasas) da semana anterior.

As diferentes axencias meteorolóxicas consultadas anuncian, a día de hoxe, certa precipitación entre martes e xoves segundo a axencia, e nas previsións a máis longo prazo esperan novas choivas para diferentes días da última semana do mes. En calquera caso, mesmo nas viñas máis tardías non se esperan danos, xa que os acios xa hai tempo que non son sensibles ao patóxeno e, aínda aparecendo síntomas nos órganos máis tenros, a vexetación deste ano nas viñas é máis que suficiente para garantir a maduración.

Volvemos notar un aumento de follas co micelio do fungo en viñas de todas as comarcas. Porén, os rebuscos están en xeral sas, e a presencia do fungo nos afectados é reducida en xeral.

Unicamente vimos lixeiras trazas de botrite en grans moi illados. A práctica ausencia desta enfermidade a finais de campaña débese, como xa mencionamos anteriormente, á estabilidade climática que se está rexistrando e que, en xeral, parece que se vai manter nos próximos días (salvo os episodios de precipitacións, en principio lixeiras, que se darán algunhas xornadas segundo as previsións actuais). Por este motivo, xa non se esperan danos de importancia.

Por outra banda, nesta semana observamos por primeira vez na campaña, e só nalgunhas fincas, acios afectados de podremia aceda, enfermidade que fai que os acios presenten olor a vinagre, que a polpa da uva se descompoña e que haxa moscas das froitas nos arredores. En todo caso, tamén polas condicións ambientais que se están a dar, a súa incidencia é reducida.

Como sabemos, nas trampas das nosas parcelas de seguimento non capturamos nesta campaña ningún macho de Eupoecilia ambiguella. Pola contra, todos os danos causados por couzas debéronse a Lobesia botrana, como é habitual na nosa zona. Esta semana tivemos en xeral poucas capturas (non superaron os 20 individuos/trampa e o máis frecuente foi entre 2 e 10) pero si en dúas fincas do Salnés observamos un número elevado de postas (moi superior ao limiar de tolerancia), que non só afectaban aos acios en maduración senón tamén aos rebuscos. Aínda que parte deses ovos poden non ser viables, nunha finca na que a vendima non está prevista ata a última semana de setembro, recomendamos que se aplicase un tratamento cun insecticida biolóxico (3 días de prazo de seguridade)

Do mesmo xeito que en toda a campaña, as capturas de cicadélidos Empoasca vitis e Zygina rhamni nas trampas mantivéronse en niveis bastante baixos nas nosas parcelas de seguimento, aínda que aumentaron lixeiramente fronte á revisión anterior. Pola súa parte, seguimos sen recoller os primeiros adultos de Scaphoideus titanus. Canto á presencia de ninfas nos recontos ás follas, foi moi baixa en todas as fincas que visitamos.

Esta campaña practicamente non se observou máis que síntomas do ácaro causante da erinose, que se mantén en niveis baixos.

A estas alturas da campaña sabemos que en case todas as fincas hai síntomas de alteracións de madeira, de golpes de sol, de paxaros e vespas, e tamén nalgunhas (especialmente naquelas con solos menos profundos e areosos) síntomas de seca e/ou carencias.

Segundo as nosas observacións desta semana, nestes momentos hai poucas eirugas e son de tamaño aínda reducido, o que da síntomas máis ou menos iniciais nas plantas. Sen embargo, seguimos a recibir moitas consultas acerca de como actuar fronte esta praga. É importante comprobar se hai eirugas nas sebes (revisando as plantas para observar síntomas nas follas máis novas e abrindo os niños que fan coas follas) antes de aplicar un tratamento, pois moitas veces o que se observan son síntomas antigos, dunha xeración anterior.